UEFA duket se është e prirur tashmë për të zhvilluar një luftë të ashpër me tre klubet themeluese të projektit të Superligës Evropiane, Real Madrid, Barcelona dhe Juventus.
Konflikti duket larg zgjidhjes. Dhe me vendimin e ri të Gjykatës së Madrid-it, i cili anoi nga qeveria e futbollit evropian, tre klubet pritet të përballen me sanksione. Por, jo të menjëhershme.
Seanca për të përballur palët është caktuar më 14 qershor, ndërsa koha e dënimit pritet të shtyhet deri në 2023. Kjo pasi palët presin edhe vendimin e Gjykatës së Drejtësisë së Bashkimit Evropian për çështjen e monopolit të UEFA-s.
Sipas italianes “La Gazzetta dello Sport”, tre klubet rrezikojnë të gjobiten deri në 15 milionë euro, si dhe do t’u mbahet 5% e të ardhurave nga UEFA. Por, nuk përfundon këtu, pasi duke filluar nga sezoni 2023/24, ato rrezikojnë pjesëmarrjen në Champions League.
