Turqia ka filluar të paguajë një pjesë të gazit të saj natyror nga Rusia në rubla, tha të martën ministri turk i Energjisë Fatih Donmez.
Në një intervistë për transmetuesin “TRT Haber”, Donmez tha se në muajt e ardhshëm pjesa e pagesave në monedhën vendase në tregtinë e energjisë me Rusinë do të rritet.
Rusia, e goditur nga sanksionet perëndimore për pushtimin e saj në Ukrainë, po kërkon gjithnjë e më shumë nga blerësit e energjisë së saj të paguajnë në rubla për të ndihmuar në forcimin e monedhës së saj. Shumica e marrëveshjeve ndërkombëtare të energjisë zgjidhen në dollarë amerikanë ose euro.
Turqia po përpiqet gjithashtu të nxisë tregtinë duke përdorur lirën, e cila është goditur nga politikat monetare joortodokse.
Ankaraja dhe Moska ranë dakord në shtator për të filluar pagesat me rubla për furnizimet me gaz natyror.
Kur u pyet për propozimin e presidentit rus Vladimir Putin për një qendër të gazit natyror në Turqi, Donmez tha se Ankaraja do të hartojë një udhërrëfyes deri në fund të këtij viti dhe mund të mbajë një konferencë për furnizuesit dhe blerësit.
“Ne mund të organizojmë një konferencë ndërkombëtare të gazit, ndoshta në janar ose shkurt, për të bashkuar furnizuesit e gazit dhe vendet importuese për të marrë mendimin e tyre, ne do të vazhdojmë sipas kësaj”, theksoi Donmez.
Muajin e kaluar, Putin propozoi Turqinë si një bazë për furnizimet me gaz si një rrugë alternative pasi tubacionet Nord Stream nën Detin Baltik u dëmtuan nga shpërthimet. Presidenti turk Recep Tayyip Erdogan tha se ishte dakord me idenë.
Bashkimi Evropian, i cili më parë mbështetej tek Rusia për rreth 40% të nevojave të saj për gaz, po kërkon të heqë dorë nga energjia ruse pas pushtimit të Ukrainës në shkurt.
