TikTok-u ka njoftuar prezantimin e postimeve vetëm me tekst, pasi bëhet kompania më e fundit e teknologjisë që kërkon të përfitojë nga njerëzit që mund të kërkojnë një alternativë ndaj Twitter-it.
Platforma tani do t’i lejojë përdoruesit të krijojnë përmbajtje të bazuar në tekst, në një lëvizje që e ka karakterizuar si “zgjerim i kufijve të krijimit të përmbajtjes për të gjithë në TikTok”.
Po ashtu përdoruesit do të mund të shtojnë sfonde me ngjyra në postime, të cilat kanë një kufi prej 1 mijë fjalësh.
Nga ana tjetër, Twitter-i po vuan financiarisht, duke njoftuar në korrik se të ardhurat e tij nga reklamat kishin rënë me 50% pasi reklamuesit ndaluan shpenzimet në faqe.
Kompanitë rivale të teknologjisë kanë përdorur kaosin dhe trazirat e perceptuara të blerjes së Twitter-it nga Elon Musk si një mundësi për të tërhequr disa nga bazat e tij të përdoruesve dhe për të nisur platformat rivale.
Threads është aplikacioni i bazuar në tekst në Instagram, i cili përdor bazën ekzistuese të përdoruesve të Instagram-it dhe u lançua me shumë bujë në fillim të këtij muaji.
Teksa Threads pa 100 milionë njerëz të regjistruar në më pak se pesë ditë pas fillimit të tij, numri i përdoruesve aktivë të përditshëm ka rënë që atëherë me 70%.
TikTok ka pak më shumë se një miliard përdorues, sipas faqes së internetit të kompanisë, ndërsa Instagram-i ka 2.3 miliardë përdorues.
Audienca e TikTok-ut është më e re se ajo e Instagram-it, me vëzhguesin e Komunikimeve në Mbretërinë e Bashkuar që zbuloi këtë javë se është burimi numër një i lajmeve për 12 deri në 15-vjeçarët, i ndjekur nga YouTube-i dhe Instagram-i.
Megjithatë, TikTok është përballur me kritika për lidhjet e tij me Kinën, me qeveritë kanadeze, amerikane, britanike dhe australiane që kufizojnë aplikacionin në pajisjet në pronësi të qeverisë.
Këtë javë, kompania zbuloi se punonjësit e saj me bazë në Kinë mund të kenë akses në disa të dhëna të përdoruesve australianë.
