Shtetet e Bashkuara të Amerikës (SHBA) nuk do të negociojnë përjashtimet nga sanksionet – e lidhura me Ukrainën – ndaj Rusisë për të shpëtuar marrëveshjen bërthamore iraniane të vitit 2015.
Ata në vend të kësaj do të përpiqen të arrijnë një marrëveshje alternative që përjashton Rusinë nëse Kremlin-i nuk tërhiqet nga kërkesat e minutës së fundit.
Kjo u bë e ditur nga një zyrtar i lartë i Departamentit Amerikan të Shtetit.
Me një nga synimet kryesore të politikës së jashtme të Presidentit Biden të rrezikuar, zyrtari i lartë tha se Moska kishte një javë për të tërhequr kërkesën e saj për garanci me shkrim që e përjashtonin Rusinë nga çdo sanksion lidhur me Ukrainën, që do të kufizonte tregtinë e ardhshme të Moskës me Iranin.
Garanci të tilla mund të zvogëlojnë sanksionet e Perëndimit të vendosura ndaj Rusisë për pushtimin e Ukrainës.
“Unë nuk e shoh hapësirën për të shkuar përtej asaj që është brenda kufijve të JCPOA-së”, tha zyrtari i lartë amerikan, duke iu referuar marrëveshjes bërthamore të vitit 2015 të njohur zyrtarisht si Plani i Përbashkët Gjithëpërfshirës i Veprimit.
Ish-presidenti, Donald Trump, doli nga marrëveshja në vitin 2018 dhe rivendosi sanksione të gjera, duke thënë se marrëveshja dështoi të ndalonte rrugën e Iranit drejt një arme bërthamore.
Si përgjigje, Irani zgjeroi punën e tij bërthamore, duke shkelur shumicën e kufijve në marrëveshje.
Zyrtari tha se një marrëveshje midis Iranit dhe SHBA-ve ishte “brenda arritjes”, duke shtuar se vetëm disa çështje po pengonin marrëveshjen. kur bisedimet në Vjenë u ndërprenë të premten për shkak të kërkesës së Rusisë.
Zyrtari i quajti kërkesat e Rusisë “pengesa më serioze për arritjen e një marrëveshjeje”.
Ai tha se nëse Rusia shtyn kërkesat e saj të garancisë ose nuk përgjigjet “javën e ardhshme”, Washingtoni do të duhet “të shqyrtojë shumë shpejt një rrugë alternative”.
Në fillim të këtij muaji, ndërsa diplomatët perëndimorë po kërkonin të përfundonin bisedimet, Rusia kërkoi garanci që puna e saj sipas JCPOA do të përjashtohej nga sanksionet perëndimore mbi Ukrainën.
SHBA-të kishin dhënë përjashtime nga sanksionet për marrëveshjen e 2015-ës.
Megjithatë, pasi ministri i Jashtëm rus, Sergey Lavrov, u tha gazetarëve se Moska dëshironte garanci shumë më të gjera, kryenegociatori i saj në Vjenë, Mikhail Ulyanov, prezantoi një dokument të dytë para negociatorëve evropianë të martën që kërkon të mbrojë të gjithë tregtinë dhe investimet e ardhshme kundër sanksioneve të lidhura me Ukrainën.
Nuk mund të përcaktohet nëse Irani do të ishte i gatshëm të negocionte një marrëveshje alternative pa Rusinë, apo nëse Kina – e cila është afruar më shumë me Rusinë – do të merrte pjesë.
Zyrtarët evropianë thanë gjithashtu të premten se do të ishin të hapur për të eksploruar një marrëveshje alternative me Iranin pa Rusinë.
