Një iniciativë për mbledhje firmash kundër Superligës. Një milion firma për t’i thënë “Jo” projektit të klubeve të mëdha europiane, duke e shtyrë edhe Komisionin e Bashkimit Europian që të thotë fjalën e tij në lidhje me këtë temë.
Një grup qytetarësh europianë kanë marrë iniciativën e quajtur “Ëin It On The Pitch” (Të fitosh në fushë). Komisioni e BE-së e ka regjistruar këtë iniciativë dhe tani organizatorët kanë 6 muaj kohë për të mbledhur firmat. Nëse brenda një viti mblidhen një milion deklarata mbështesë në të paktën 7 vende anëtare të BE-së, Komisioni duhet të reagojë dhe të vendosë, nëse do ta vazhdojë apo jo kërkesën.
Teksti i nënshkrimit, i frymëzuar nga ‘rezoluta Frankovski’ (emri i deputetit europian dhe ish-futbollist), propozon “mbrojtjen e futbollit europian, njohjen e vlerave sociale të sportit në shoqërinë europiane, njohjen e natyrës specifike të sportit në rregullat e konkurrencës së BE-së, forcimin e vizionit të këtij institucioni dhe politikave afatgjata për të ardhmen e futbollit europian”.
Ky instrument është parashikuar në traktatin e Lisbonës për t’u dhënë mundësinë qytetarëve të influencojnë në programin e punës së Komisionit dhe ka lindur në prill të 2012-ës. Që atëherë Komisioni ka marrë 111 kërkesa regjistrimi, nga të cilat 87 janë gjykuar të pranueshme dhe janë regjistruar.
