Kritiku i Kremlinit, Alexei Navalny, është shpallur fajtor për mashtrim në shkallë të gjerë nga një gjykatë ruse, raporton agjencia mediatike, Reuters.
Prokurorët rusë po kërkojnë të transferojnë Navalny në një koloni penale të sigurisë maksimale për 13 vjet me akuza për mashtrim dhe përbuzje të gjykatës.
Prokurorja gjithashtu kërkoi që ai të paguante një gjobë prej 1.2 milionë rublash (8 mijë e 685 dollarë).
“Nuk mund t’i futësh të gjithë në burg. Edhe nëse kërkoni 113 vjet, nuk do të më trembni mua apo të tjerët si unë”, tha Navalny në gjykatë.
Navalny tashmë po vuan një dënim prej dy vitesh e gjysmë në një kamp burgu në lindje të Moskës për shkelje të lirimit me kusht në lidhje me akuzat që ai thotë se ishin të sajuara për të penguar ambiciet e tij politike.
Zëdhënësja e Navalny, Kira Yarmysh, tha se dënimi i tij varet nga “jetëgjatësia e Putinit në pushtet”.
Navalny është “një person absolutisht i pafajshëm që është në gjyq, sepse ai flet të vërtetën për regjimin kriminal të Putinit”, tha Lyubov Sobol, aktivist politik i opozitës dhe mbështetës i Navalny-t, i cili, si Yarmysh, është larguar nga Rusia.
Hetuesit akuzojnë Navalny për vjedhje dhe për përdorim personal të donacioneve në vlerë prej disa milionë dollarësh që iu dhanë organizatave të tij politike.
Para se të burgosej, Navalny ishte lideri kryesor i opozitës ruse dhe ekipi i tij publikonte shpesh hetime mbi pasurinë e elitave ruse që mblodhën miliona shikime në YouTube.
Në një përpjekje për të kontrolluar më tej informacionin e disponueshëm për audiencën e saj vendase, Rusia këtë muaj kufizoi aksesin në Twitter, Facebook dhe Instagram dhe ka bllokuar faqet e internetit të disa mediave të pavarura të lajmeve.
Gjatë fjalimit të tij të fundit, Navalny dënoi ndërhyrjen e Rusisë në Ukrainë, duke thënë se ishte “detyrë e çdo personi” ta kundërshtonte atë.
