Gjykata Ndërkombëtare e Drejtësisë (ICJ), institucioni më i lartë i Kombeve të Bashkuara, të mërkurën e 16 marsit – pas një kërkese urgjente të Ukrainës – ka vendosur që Rusia të ndalë pushtimin e saj.
Me 13 vota pro dhe dy vota kundër, Federata Ruse do të duhet t’i pezullojë menjëherë operacionet ushtarake që filloi më 24 shkurt.
Që nga fillimi i luftës në Ukrainë më 24 shkurt, ky është vendimi i parë i tillë i dhënë nga një gjykatë ndërkombëtare.
Kievi akuzon Moskën për përpjekje të paligjshme për të justifikuar luftën.
Përfaqësuesi i Ukrainës, Anton Korynevych, kërkoi që GJND-ja të urdhëronte Rusinë për “të pezulluar menjëherë operacionet ushtarake”.
“Rusia duhet të ndalet dhe gjykata ka një rol për të luajtur”, tha ai.
Rusia bojkotoi seancat e GJND-së në fillim të këtij muaji.
Në një dosje me shkrim, Moska argumentoi se gjykata “nuk kishte juridiksion” sepse kërkesa e Ukrainës binte jashtë fushëveprimit të Konventës së Gjenocidit të OKB-së të vitit 1948, mbi të cilën ajo bazoi çështjen e saj.
Rusia vazhdoi duke thënë se “po vepronte në vetëmbrojtje” për të justifikuar pushtimin e saj në Ukrainë.
Ukraina tha se, Konventa e Gjenocidit, të cilën të dy vendet e kanë nënshkruar, nuk lejon një pushtim.
Nuk ka asnjë provë se Ukraina ka kryer apo planifikuar sulme që mund të konsiderohen si krime kundër njerëzimit.
