Kuvendi i Shqipërisë ka miratuar një projekt-rezolutë për mbështetjen e Ukrainës dhe integritetit të saj territorial pas agresionit rus, i cili ka filluar më 24 shkurt dhe vijon ende.
Në këtë projekt-rezolutë, Kuvendi i Shqipërisë shpreh fillimisht shqetësimin mbi situatën në Ukrainë.
Bazuar në gjithë ngjarjet e fundit, Shqipëria dënon me forcë agresionin ushtarak rus në Ukrainë, të paprovokuar dhe pajustifikuar.
Veprimtaria diplomatike nxitet, për të pasur një angazhim më të madh me vendet aleate të Bashkimit Evropian dhe SHBA-ve, në mbështetje të sovranitetit të Ukrainës.
Sanksionet ekonomike dhe masat diplomatike të ndërmarra mbështeten plotësisht. Po ashtu, një thirrje e menjëhershme vjen nëpërmjet kësaj projekt-rezolute, për uljen e tensionit dhe tërheqjen e trupave të Federatës ruse nga Ukraina.
Ndërkaq, Qeverisë së Shqipërisë, në dy pikat e fundit, i kërkohet të vazhdojë angazhimin me struktura si NATO, BE-ja, Këshilli i Sigurimit (ku Shqipëria bën pjesë), Organizata e Kombeve të Bashkuara, OSBE-ja dhe me Këshillin e Evropës në rajonin e Ballkanit.
Nxitje për Qeverinë vjen edhe për të forcuar përpjekjet për integrimin evropian të vendit dhe rajonit në strukturat euro-atlantike, në kuadër të ruajtjes së sigurisë dhe stabilitetit në Evropë.
Pjesë e seancës ishte edhe Ambasadori i Ukrainës, Volodymyr Shkurov, i cili e ka përshëndetur vendimin e Kuvendit të Shqipëri për të mbështetur Kievin në këto ditë të vështira jo vetëm për gjithë ukrainasit, por për gjithë botën.
Rezoluta
Duke u bazuar në Kartën e Kombeve të Bashkuara, Aktin Final të Helsinkit dhe dokumentat e OSBE-së që e kanë pasuar atë, Memorandumin e Budapestit të vitit 1994 mbi Garancitë e Sigurisë lidhur me aderimin e Ukrainës në Traktatin e Mos-përhapjes së Armëve Bërthamore, Marrëveshjet e Minskut të vitit 2014 dhe paketën e masave në zbatim të tyre të nënshkruar në vitin 2015;
Duke shprehur shqetësim te thellë për faktin se vlerat e bashkëjetesës paqësore mes popujve, demokracia dhe të drejtat e njeriut, të promovuara në Evropë dhe në botë, pas Luftës së dytë Botërore, janë cënuar rendë nga agresioni ushtarak i Federatës Ruse kundër Ukrainës;
Në mbështetje të sovranitetit, tërësisë territoriale dhe zhvillimit demokratik të Ukrainës;
Në mbështetje të plotë qendrimit të vendeve të tjera në të gjithë botën, që aspirojnë e mbrojnë vlerat demokratike, në përputhje të plotë me politikën e përbashkët të jashtme e të sigurisë të Bashkimit Evropian, përfshirë vendimet e Bashkimit Evropian për masa shtrënguese;
Në respekt dhe nën përgjegjësinë të rolit të Shqipërisë si anëtar jo i përhershëm i Këshillit të Sigurimit të Organizatës së Kombeve të Bashkuara për periudhën 2022-2023;
Duke marrë në konsideratë rrezikun e ndikimit në rajonin tonë të agresionit rus në Ukrainë me pasojë demotivimin e perspektivës euroatlantike të rajonit për ruajtjen e sigurisë dhe stabilitetit në Evropë;
Kuvendi i Republikës së Shqipërisë
Dënon me forcë agresionin ushtarak rus në Ukrainë dhe shkeljen e rëndë nga ana e Federatës Ruse të sovranitetit dhe tërësisë territoriale të Ukrainës, si një akt që dhunon rendin ndërkombëtar, duke shkelur hapur dhe në mënyrë flagrante Kartën e Kombeve të Bashkuara, Aktin Final të Helsinkit, Memorandumin e Budapestit, Marrëveshjet e Minskut, si dhe një sërë dokumentesh të tjerë ndërkombëtarë dhe dypalësh që Rusia ka firmosur me vullnet të lirë.
Nxit dhe mbështet veprimtarinë diplomatike dhe masat e marra nga qeveria shqiptare, në bashkërendim me aleatët tanë strategjikë, SHBA dhe BE, në mbështetje të sovranitetit të Ukrainës dhe të parimeve të sigurisë evropiane dhe rendit global të marrëdhënieve midis shteteve.
Mbështet sanksionet ekonomike dhe masat diplomatike të ndërmara nga partnerët strategjikë ndaj Federatës Ruse, dhe ndihmën ushtarake dhe humanitare për Ukrainën dhe popullin e saj.
Bën thirrje për ndalimin e menjëhershëm të përdorimit të forcës nga Federata ruse në Ukrainë dhe për tërheqjen e forcave ushtarake ruse nga territori i Ukrainës sipas kufijve të njohur ndërkombëtarisht.
Dënon me forcë agresionin ushtarak rus ndaj Ukrainës, duke vlerësuar se aktet kundër civilëve të pafajshëm janë krime lufte dhe se shkaktarët e këtij agresioni duhet të përballen me Gjykatën Ndërkombëtare të Drejtësisë.
Kuvendi i kërkon Qeverisë që:
Të vazhdojë angazhimin, në bashkërendim të ngushtë me të gjitha vendet aleate dhe partnere në NATO, BE, KS të OKB, OSBE, KiE, në rajonin e Ballkanit dhe me partnerë të tjerë, në mbështetje të sovranitetit dhe tërësisë territoriale të Ukrainës dhe të parimeve të së drejtës ndërkombëtare dhe të sigurisë evropiane;
Të forcojë me prioritet përpjekjet për integrimin evropian të vendit dhe rajonit si mbështetje e pazëvendësueshme për ruajtjen e sigurisë dhe stabilitetit në Evropë.
