Shtetet e Bashkuara të Amerikës, Mbretëria e Bashkuar, kërkuan lirimin e menjëhershëm të tre policëve të kidnapuar nga shteti i Serbisë, megjithatë të njëjtit ndryshe nga versioni zyrtar i Qeverisë së Kosovës rrëmbimin e tre zyrtarëve policorë nuk e cilësuan si kidnapim, por arrestim/ndalim.
Me një qasje të tillë, megjithatë, nuk është pajtuar kryeministri i Kosovës, Albin Kurti, i cili në një intervistë për Klan Macedonia, ka deklaruar se “çfarëdolloj hezitimi për të quajtur gjërat dhe zhvillimet me emrat e tyre të vërtetë nga regjimi autokratik në Beograd do të merret si frikë ose si dobësi”.
Kurti ka kritikuar edhe mos-deklarimin e një numri të konsiderueshëm të shteteve perëndimore pas, sipas tij, kindapimit të tre zyrtarëve policore nga shteti i Serbisë, duke cilësuar këtë mos-pozicionim karshi Serbisë si të “paarsyeshme dhe të dëmshme”.
“Nuk i kontribuon as normalizimit as de-eskalimit meqenëse çfarëdolloj hezitim për të quajtur gjërat dhe zhvillimet me emrat e tyre të vërtetë nga regjimi autokratik në Beograd do të merret si frikë ose do të merret si dobësi prandaj unë besoj që jo vetëm se është e padrejtë, por është edhe e paleverdishme heshtja e perëndimit demokratik në përgjithësi karshi agresionit të Beogradit zyrtar”.
Misioni i NATO-s në Kosovë, KFOR-i, tha se nuk është e qartë se ku kanë qenë tre policët e Kosovës, në kohën e arrestimit nga forcat serbe.
SHBA-të, Mbretëria e Bashkuar kanë bërë thirrje për lirimin e tre policëve kufitar të Kosovës, për të cilët autoritetet e Kosovës pretendojnë se janë rrëmbyer brenda territorit të Kosovë nga forcat serbe.
