Presidenti i Turqisë, Recep Tayyip Erdogan, të enjten e 28 prillit do të vizitojë Arabinë Saudite, ku do të takojë princin e kurorës Mohammed Bin Salman, thanë dy burime për agjencinë e lajmeve “Reuters”.
Ankaraja po përpiqet të ndreqë lidhjet me Riadin, pas heqjes dorë nga një çështje ligjore për vrasjen e gazetarit Jamal Khashoggi në Stamboll.
Qëkurse një ekip saudit vrau Khashoggi në konsullatën e mbretërisë në Stamboll në vitin 2018, marrëdhëniet kanë qenë të tensionuara.
Në atë kohë, Erdogan dhe qeveria e tij kishin akuzuar zyrtarë të lartë sauditë, përfshirë Princin Mohammed, për përfshirje në vrasje dhe për pengim të një procesi ligjor.
Komentet e Ankarasë atëherë, të cilat erdhën në mes të protestave të përhapura globale, nxitën një bojkot jozyrtar saudit të produkteve turke.
Që atëherë, Ankaraja e ka zbutur ashpër retorikën e saj ndaj Riadit dhe ka shkuar aq larg sa thotë se nuk ka çështje dypalëshe midis dy fuqive rajonale.
Si pjesë e një ofensive rajonale të nisur në vitin 2020 mes izolimit në rritje, Ankaraja ka bërë hapa për të përmirësuar lidhjet me disa vende, duke përfshirë Egjiptin, Izraelin, Emiratet e Bashkuara Arabe dhe Arabinë Saudite.
Ajo u është drejtuar gjithashtu shumë shteteve të Gjirit për mbështetje ekonomike, pasi përballet me rritjen e inflacionit dhe një rritje të çmimeve të energjisë pas pushtimit të Ukrainës nga Rusia më 24 shkurt.
Muajin e kaluar, Riadi kërkoi që Ankaraja të dorëzonte rastin e vrasjes së Khashoggi-t, i cili ishte në vazhdim në Turqi. Këtë muaj, Ankaraja miratoi kërkesën, e ndërpreu çështjen dhe e dërgoi në Riad.
“Do të ketë një takim me MbS gjatë vizitës në Arabinë Saudite”, tha një nga burimet, një zyrtar i lartë turk, në kushte anonimiteti, duke përdorur akronimin e njohur gjerësisht për emrin e Princit Mohammed.
“Do të diskutohen shumë çështje, nga ekonomia, investimet, çështjet rajonale, duke lënë pas kohët e trazuara në marrëdhëniet dypalëshe. Pritet të jetë një takim efikas për të dyja palët”, tha zyrtari.
Nëse realizohet, takimi do të jetë kulmi i përpjekjeve disamujore të Ankarasë për të riparuar lidhjet, pasi ajo kërkon të lehtësojë problemet ekonomike në rritje.
Burimi: Reuters
