Bileta gratis për tifozët e skuadrave që do të shkojnë në finale të kupave të Europës këtë vit. Vendimi ëhstë marrë nga presidenti i UEFA-s, Aleksander Ceferin, i cili ka shpjeguar se kjo është një mënyrë për të falënderuar dhe shpërblyer tifozët për mbështetjen që i kanë dhënë futbollit gjatë krizës së pandemisë së Covid-19.
UEFA ka saktësuar se fansat e klubeve do t’i marrin biletat falas sipas kësaj ndarjeje: për finalen e Ligës së Kampionëve do të jepen falas 10.000 bileta (5000 për çdo skuadër), për finalen e Ligës së Europës 8.000 (4.000 për skuadër), për finales e Ligës së Konferencës që zhvillohet në Tiranë 6.000 (3.000 për skuadër) dhe për finalen e Ligës së Kampionëve femërore 6.000 (3.000 për skuadër).
Në total, biletat që UEFA do t’u dhurojë tifozëve për finalet e kompeticioneve europiane për klube do të jenë 30.000. Në njoftimin e UEFA-s shkruhet se çdo skuadër finaliste mund t’i përdorë këto bileta për të nderuar tifozët e vet më besnikë (ata që janë të abonuar prej më shumë kohësh dhe që kanë ndjekur më shumë ndeshje). Këto bileta nujk mund t’u jepen sponsorëve, partnerëve, apo drejtuesve të klubeve.
