Qeveria italiane është gati të rindërtojë një teatër në qytetin e rrethuar ukrainas Mariupol, i cili u shkatërrua nga një sulm me bombë.
Kështu ka bërë me dije ministri italian i Kulturës, Dario Franceschini, pas një takimi të kabinetit.
“Kabineti ka miratuar propozimin tim për t’i ofruar Ukrainës burimet dhe mjetet për ta rindërtuar atë sa më shpejt të jetë e mundur”, ka thënë ministri.
Ai ka shtuar se “teatrot e të gjitha vendeve i përkasin të gjithë njerëzimit”.
Ukraina ka njoftuar se teatri u godit nga një sulm ajror rus të mërkurën, teksa njerëzit ishin strehuar atje nga bombardimet.
Rusia, nga ana tjetër, e ka mohuar goditjen e teatrit.
Mirëpo, forcat e saj kanë shpërthyer qytete dhe kanë vrarë shumë civilë në sulmin ndaj Ukrainës, që hyn në javën e katërt.
