Federata Shqiptare e Futbollit do të shtyjë zgjedhjet për presidentin e ri.
Kjo, pas vendimit të Gjykatës së Tiranës për pezullimin e kreut të FSHF-së Armand Duka nga funksionet e tij.
Ishte pikërisht Duka që njoftoi lajmin përmes një postimi në median sociale “Facebook”.
“Duke qenë dëshmitar të një procesi të ndërlikuar me debate e akuza, por edhe disa vendime gjyqësore, përfshirë dhe atë për Shoqatën Rajonale të Futbollit Tiranë që duhet të respektohen detyrimisht, unë do t’i propozoj dhe do t’i kërkoj Asambles që pikën e rendit e ditës për zgjedhjet e organeve drejtuese të FSHF për President dhe anëtar të Komitetit Ekzekutiv, të shqyrtohen në një datë tjetër”, shkruan drejtuesi i institucionit të futbollit.
Të enjten e 10 shkurtit, Gjykata e Tiranës i dha të drejtë Bashkisë së Tiranës, në padinë që ky institucion, në cilësinë e aksionarit në Klubin e Futbollit Tirana, ngriti kundër Dukës.
Bashkia e Tiranës, me në krye Erion Veliajn, ka paditur Dukën për një sërë akuzash, ndër të cilat korrupsion në krye të FSHF-së.
Sipas tyre, akuzat kishin të bënin me një përpjekje për të destabilizuar garën zgjedhore.
