Gjatë sulmit raketor të nisur mbrëmjen e kësaj të marte nga Rusia kundër Ukrainës, dyshohet se dy raketa ruse kanë arritur në Poloni, duke goditur qytetin Przewodów, pranë kufirit me Ukrainën.
Lajmi është raportuar nga faqja e internetit “Radio Zet”, e cila citon burime jozyrtare që flasin për dy persona të vrarë nga raketat që do të kishin goditur një depo drithërash.
Sipas një zyrtari të rëndësishëm të inteligjencës amerikane të cituar nga “Guardian”, raketat ruse kanë rënë në një vend anëtar të NATO-s për herë të parë që nga fillimi i luftës.
Polonia, Hungaria dhe Sllovakia kanë mbledhur Këshillin e tyre të Mbrojtjes. Raketat mund të kenë rënë gabimisht në territorin polak, gjatë atij që – në orët e fundit – ka qenë një bombardim masiv nga trupat e Moskës në territorin ukrainas.
Moska mohon sulmin
Moska ka përgënjeshtruar lajmin, duke thënë se është një “provokim i qëllimshëm”. Ministria ruse e mbrojtjes reagoi në Telegramin e saj, duke i quajtur raportimet “një provokim të qëllimshëm për të përshkallëzuar situatën”.
“Asnjë goditje nuk u krye kundër objektivave pranë kufirit shtetëror ukrainas-polako nga mjetet ruse të shkatërrimit”, thuhet në deklaratë. Ai tha se fragmentet e raketave nga vendi i ngjarjes, të raportuara dhe të filmuara nga media polake, nuk kishin të bënin me armët ruse.
Dyshimet e mediave polake!
Mediat polake, thonë se raketat ruse të rëna në Poloni, mund të jenë mbetje të një rakete të rrëzuar nga ushtria e Ukrainës gjatë mbrojtjes ajrore.
“Burimet e mia në shërbimet, thonë se ajo që goditi Przwowo, janë me shumë gjasa mbetjet e një rakete të rrëzuar nga forcat e armatosura ukrainase”. Kjo u shkrua në Twitter nga Mariusz Gierszewski i “Radio Zet”, transmetuesi që dha i pari lajmin për raketat që ranë në territorin polak.
Pentagoni dhe NATO
Pentagoni tha se ishte në dijeni të raporteve të shtypit për rënien e raketave ruse në Poloni. “Për momentin nuk kemi asnjë informacion tjetër që mund t’i konfirmojë ato. Ne jemi duke hetuar”, tha Pentagoni.
Një burim i Shtëpisë së Bardhë tha gjithashtu se një hetim ishte duke u zhvilluar për të zbuluar saktësisht se çfarë ka ndodhur.
“Ne do të mbrojmë çdo centimetër të territorit të NATO-s,” tha zëdhënësi i Pentagonit Pat Ryder për lajmin, duke folur për aktivizimin e nenit 5 të Aleancës Atlantike.
NATO tha po “ekzaminon” raporte të pakonfirmuara për sulmet me raketa ruse në Poloni duke vrarë dy persona . Këtë e ka bërë të ditur një zyrtar i Aleancës Atlantike, duke saktësuar se NATO po “koordinon ngushtë me aleatin polak”.
SHBA: Nuk duam përshkallëzim
SHBA-të nuk “kërkojnë përshkallëzim apo provokime”. Kështu ka deklaruar zëvendës-zëdhënësi i Departamentit Amerikan të Shtetit, Vedant Patel, pasi u pyet nga gazetarët pas deklaratave ruse sipas të cilave raketat që ranë në Poloni janë provokim.
“Ne kemi parë lajmet që vijnë nga Polonia dhe po punojmë me qeverinë polake për të mbledhur më shumë informacion, nuk mund të konfirmojmë lajmin apo ndonjë detaj për momentin”.
Kështu shkroi në Twitter zëdhënësja e Këshillit të Sigurisë Kombëtare, Adrienne Watson, e cila më pas shtoi: “Ne do të përcaktojmë se çfarë ka ndodhur dhe cilat do të jenë hapat e duhur për të ndërmarrë”.
Çfarë parashikon neni 5 i NATO-s?
Neni 5 kërkon që të gjitha vendet e NATO-s të ndërhyjnë në mbrojtje të një sulmi ndaj një prej anëtarëve të Aleancës. Megjithatë, nuk ka automatizma.
“Palët bien dakord që një sulm i armatosur kundër një ose më shumë prej tyre në Evropë ose Amerikën e Veriut do të konsiderohet si një sulm kundër të gjithave, dhe rrjedhimisht bien dakord që nëse ndodh një sulm i tillë, secili prej tyre, në ushtrimin e të drejtës së vetëmbrojtjes, individuale ose kolektive […] do të ndihmojnë palën ose palët e sulmuara, duke ndërmarrë menjëherë, individualisht dhe në bashkëpunim me palët e tjera, veprimin që e gjykon të nevojshme, duke përfshirë përdorimin e forca të armatosura për të rivendosur dhe ruajtur sigurinë në rajonin e Atlantikut të Veriut. Çdo sulm i tillë i armatosur dhe të gjitha masat e marra si rezultat i tij do t’i njoftohen menjëherë Këshillit të Sigurimit. Këto masa do të përfundojnë kur Këshilli i Sigurimit të ketë marrë masat e nevojshme për të rivendosur dhe ruajtur paqen dhe sigurinë ndërkombëtare”.
Zelenski: Përshkallëzim i rëndësishëm i sulmit në territorin e NATO-s
Sulmi në territorin e NATO-s është “një përshkallëzim shumë domethënës” dhe “është e nevojshme të veprohet”.
Kështu ka thënë presidenti ukrainas Volodymyr Zelenskij, transmeton Nexta. “Terrori nuk kufizohet vetëm në kufijtë tanë kombëtarë. Raketat ruse kanë goditur Poloninë… duke lëshuar raketa në territorin e NATO-s, ky është një sulm raketor rus ndaj sigurisë kolektive. Është një përshkallëzim shumë domethënës. Ne duhet të veprojmë”, tha presidenti ukrainas, në një video të publikuar në rrjetet sociale.
