Vladimir Putin tha se bisedimet e paqes me Ukrainën ishin në një “rrugë qorre” pasi presidenti rus pretendoi se Kievi kishte devijuar nga marrëveshjet e arritura në Stamboll.
“Ne arritëm një nivel të caktuar marrëveshjesh në Stamboll, të cilat theksonin se garancitë e sigurisë për Ukrainën. . . nuk do të përhapej në Krime, Sevastopol dhe Donbas”, tha Putin të martën, duke folur publikisht për aktivitetin ushtarak të Rusisë pas një heshtjeje të zgjatur mbi këtë temë.
“Ne vepruam për të krijuar kushte për të vazhduar bisedimet”, shtoi ai.
“Në vend të kësaj, ne u përballëm me provokimin në Bucha dhe, çka është më e rëndësishmja, pala ukrainase devijoi nga marrëveshjet e Stambollit”.
Tani, “kërkesat e sigurisë janë një gjë, dhe çështjet e rregullimit të marrëdhënieve në Krime, Sevastopol dhe Donbas janë marrë jashtë atyre marrëveshjeve”, tha Putin.
“Pra, ne jemi kthyer në një rrugë qorre”.
Putin po bën gjenocid
Duke folur më vonë të martën, presidenti amerikan, Joe Biden, për herë të parë tha se pushtimi i Ukrainës nga Moska përbënte gjenocid.
Biden përdori termin gjenocid në një fjalim në një fabrikë etanoli në Iowa dhe më vonë qëndroi pranë përshkrimit ndërsa përgatitej të hipte në Air Force One.
“Po, e quajta gjenocid sepse është bërë gjithnjë e më e qartë se Putini thjesht po përpiqet të fshijë idenë për të qenë ukrainas”, u tha ai gazetarëve.
Arrestimi i oligarkut pro-rus
Të martën vonë, presidenti i Ukrainës, Volodymyr Zelensky, zbuloi se Viktor Medvedchuk, një oligark-politik pro-rus dhe mik i ngushtë i Putinit, ishte arrestuar pasi kishte ikur nga arresti shtëpiak gjatë pushtimit të plotë të vendit nga Rusia.
“Një operacion special u krye falë SBU (shërbimit të sigurisë shtetërore)”, shkroi Zelensky në një postim në Telegram.
Postimi përfshinte një fotografi të Medvedchuk të ulur në një karrige i veshur me një uniformë kamuflazhi të ushtrisë ukrainase me duar të lidhura me pranga.
Në komentet e tij të mëparshme, Putin e quajti masakrën e civilëve në Bucha, një qytet afër Kievit, një “provokim” kundër Moskës. Ai tha se pretendimet se njerëzit vdiqën në duart e ushtarëve rusë ishin “lajme të rreme” nga SHBA-të. Ukraina ndërkohë ka thënë se Rusia ishte përgjegjëse.
Putin tha se operacioni i tij ushtarak në Ukrainë po shkonte sipas planit.
“Shpesh dëgjoj pyetje nëse është e mundur të lëvizësh më shpejt. Është e mundur. Varet nga intensiteti i veprimit ushtarak dhe intensiteti i veprimit ushtarak, për fat të keq, është i lidhur në një mënyrë apo tjetër me humbje”, tha Putin në një konferencë për media me homologun e tij Bjellorus, Alexander Lukashenko.
“Detyra jonë është të arrijmë objektivat e vendosura duke minimizuar humbjet. Dhe ne do të ecim ritmikisht, me qetësi, sipas planit, që u propozua fillimisht nga shtabi i përgjithshëm”, tha presidenti rus.
Aktiviteti në Ukrainë “kishte për qëllim vetëm të bllokonte forcat, të sulmonte dhe të shkatërronte infrastrukturën ushtarake”, shtoi ai.
Shifrat e fundit nga Komisioneri i Lartë i OKB-së për të Drejtat e Njeriut tregojnë se më shumë se 1 mijë e 800 civilë janë vrarë dhe pothuajse 2 mijë e 500 janë plagosur që nga fillimi i konfliktit në shkurt.
