Rusia ka humbur rreth 30 miliardë dollarë të vlerës së saj në Prodhimin e Brendshëm Bruto në vetëm dy javë luftime në Ukrainë.
Është kjo statistika që paraqet media botërore e specializuar në fushën e ekonomisë, Bloomberg, e cila ka bërë bilancin paraprak të mësymjes ruse drejt territorit ukrainas.
Rënia më e madhe mendohet se nuk vjen prej sanksioneve – të cilat ende duhet ta shfaqin efektin e tyre – sa vjen për shkak të rënies së madhe të valutës vendase, Rublës. Gjithsesi, një analizë më e gjerë e mëvonshme, mund të tregojë fytyrën e vërtetë të goditjes së ekonomisë ruse nga faktorët e ardhur prej luftës.
Bursa e Moskës ka mbetur e mbyllur prej fillimit të agresionit, duke e bërë të pamundur kryerjen e një vlerësimi të saktë ekonomik të situatës reale.
Gjithsesi, vlera mendohet se mund të jetë edhe e madhe, kur parashtrohen në tavolinë ndalimet e shumta të shteteve të Bashkimit Evropian, të cilët kanë sanksionuar disa produkte si edhe kanë ngrirë asete të tëra bankare të Rusisë.
Ndikim në ekonomi ka pasur edhe bojkotimi i firmave më të mëdha botërore në gjithë Rusinë.
